دهنگو که‌ڵه شێری دلێ کۆلینێنه که بێژگه‌م به‌ره‌کێش جه نزیکو به‌ره‌و یانه‌ێنه وڵێوه ته‌رش نه‌وێ قۆره‌تی خوذای نمه‌زانو چه‌نی زانی که بانگو سۆح یه‌ن، ده‌س که‌رێ به قوقولی قوقو تا چننه ده‌یه‌قێوه تولش په‌نه دێ ئێمه‌ێچ که زۆڕۆی بێمێ جه ده‌نگیش بێزاری بێمێ ئاخر نازێ بوسمێ جه شیرین وه‌رمه‌نه چڵه‌کنێمانه‌ره ، درۆس چاوه‌خته‌نه که وه‌رمێوه فره وه‌ش بی نێمێ، شه‌وێوه وه‌رمه‌نه تازه پوڵێوه که بێسه‌بێ مۆوه گه‌ره‌کم بێ هۆرش گیرونه که‌به دهنگو که‌ڵه‌شێره‌کێ که کوذه سۆحێوه ده‌س که‌رێ به وه‌نه‌ی چله‌کیانێره، دلێ دڵو وێمه‌نه‌مه شیۆ هه‌زار به‌ذو بێڕاێم واتێبان که‌ڵه‌شێره‌که‌ی ئه‌گه‌ر فه‌قه‌ت نه‌ختێ ته‌ر دێرته‌ر ده‌سش که‌ردیبیا به وه‌نه‌ی ئا ورده پوڵه‌که‌بێسه‌بێ مه‌وه هۆرم گرته‌بێ و ئاورده‌بێم چه‌نی وێم.فره به ناڕه‌حه‌تی وه‌رو وێمه‌نه واچێنێ ئانه ده‌سی ئه‌نقه‌س چاوه‌خته‌نه ئا که‌ڵه‌شێره ده‌سش که‌رد به وه‌نه‌ی وه‌رو ئانه‌یه پوڵه که‌ی ناورو نه چه‌نی وێم جا دڵو وێم وه‌ش که‌رێنی که قه‌ذ نمه که‌رۆ جارێ ته‌ر زوته‌ر هۆرش مه‌گیرو نه‌وایا چێوه‌ێ ته‌ر بۆ باعسش.شۆنه‌و ئانه‌ێره‌جا دهنگو جیڕه‌و به‌رێ که بابه‌م لوێ په‌ی مزگی په‌ی نماو سوحی فره ته‌ر توڕه‌م که‌رێ، دڵمه‌نه‌واچێنێ مه‌گه‌ر خوذای په‌نه گرتن په‌ێ تاریکه شه‌وێنه مه‌لۆ په‌ی مزگی نمازو ڕۆبۆوه جابه‌ئیسراحه‌ت موانۆش ئاخرکێ ناسه‌روسه‌ره‌ێشو مه‌گه‌ر خوذای په‌نه‌گرتن دلێ ئێ فکرانه‌نه تلێێنێ و تلێێنێ تا ڕۆ بێوه.جا ئه‌ذامان لێفه‌که‌ی سه‌رمانۆ فڕه دێ و به قاڵو مه‌قاڵ هۆرمان ئێزنی.لوێمێ په‌ی مزگی په‌ی ده‌سو پل شته‌ی.چاگێچ چننه ده‌یه‌قێ وێم سه‌رو ئاوێوه ماتڵ که‌رێنێ ئاخر دڵم نه‌ی ئاوه‌ی سه‌رده بذۆنه ده‌مو چه‌میمه‌وه نه‌خته‌ی ته‌ماشاو عه‌کسه‌کێ وێم که گنێ دلی حه‌وزو مزگی که‌رێنێ ئارام ئارام ئاوه‌کێ که له‌ڵپه دێ ئاذیچه شه‌کێێوه و سه‌رو وار که‌رێ جارو بار نه‌فه‌رێ ته‌ر که ده‌مو چه‌م شۆری عه‌کسه‌کێ به شڵپه‌و ده‌سیش شیویێ جا ناڕه‌حه‌ت بێنێ وه دلی دڵیمه‌نه دژمانیش دێنێ په‌نه...دماو ئانه‌یه که گێڵێنێ وه یانه چای یه شیرینه‌که که نریابێ سه‌رو سفره‌ی وه‌سردۆوه بیه‌بێ پێسه‌و ده‌مو مه‌رده‌ی وه نانه‌کێچ ڕه‌قه بییبێوه پسه‌و لا په‌راسوی به ئجباری ئا دۆ هه‌سه فره ترشه که دلێ کاشیلێوه‌نه بێ به نانه ڕه‌قێ هۆر گێرێنێ وه خه‌ریکو وارده‌و نانو چای بێنێ جارجاریچ لچه نانێ ڕه‌قه کێ پۆسۆ نازکو دلێ ده‌میم دڕێره...
ئیتر دماو نانو چای چه‌نی زاوڕۆڵانو مه‌حه‌لێ هه‌تانیمه‌ڕۆ پا که‌ل وکوجیه‌ره بێمێ دڵی خوڵو خاکیه‌ره جارو باریچ لوێمی ته‌ماشاو گه‌مه‌و بسکتباڵی که زاوڕۆڵه دبیرستانی که‌رێنێش گه‌مه‌که‌شان وه‌رو چه‌مانمۆوه فره ماقۆڵ بێ، جوانێ په‌نه یاوای وه قوه‌تێ و باڵابه‌رزێ وه وه‌ش په‌نه کۆتێ که برێقه‌و فوکولیانشان ئێ، ئێمه‌یچ زه‌رده‌ڵێ به پاڵای پلاسکۆ کارێوه که پاژنه‌که‌شان دڕیابێ و جه ده‌سو ئاره‌قوپامانوه جارو بار پاڵاکه‌مان مانێ جیا جه تاوو ڕه‌مه ڕه‌مالێوه سه‌خت تورمزمان پێ گییرێێ و ه گێڵێمێوه به په‌له هۆرش گێرێـمێ نیێمێشان گیفانه و پای پاروا ره‌مێمی باسو پانتۆڵه‌کانمان که هه‌ر نمه‌کریۆ چڵکنێ و وڵوڵێ و پینه کریای ڕۆ ،نه‌وی چێوه‌ی گم نه‌که‌رمی وه‌رو ئانه‌یه که گیرفانه‌کێشان وڵه ش چه‌نه بێ جارو باریچ که بابه‌مان یاوێ په‌نه‌مان سه‌رو ڕایوه گێرێمانه‌ره وه‌رو شه‌قو شه‌ققه زله‌ان واچی چه‌نی هه‌تێمه ده‌رگێڵان چێش مه‌که‌رێ ده‌ی گێڵه‌وه لووه‌وه په‌ی یانه‌ی لوه په‌ی شۆبه‌و نه‌فتێ بتریێوه نه‌فته بسانه په‌ی چراو لامپاکێ ... ڕاێێ که لوان په‌ی شۆبه‌ی خوذا عه‌فوه‌ش که‌رۆ حاجی... ساحیوو شۆبه‌ی وه‌خته‌ی گه‌ره‌کش بێ نه‌فته به ڕه‌حه‌تیه‌کێش که‌رۆ دلێ بتریه‌کێم ته‌ماشایوه‌ش که‌ردان واتش وه‌ڵڵه هی هه‌تیم نه‌فته‌ت نمه‌ذۆنه په‌نه ئانه ئا کڵاوه قیزه‌ونێ چێشه‌نه پسه‌و قاڵاوی که‌ردێنه‌ت سه‌ره ده‌ی فره‌ش ده..واتم حاجی ئه‌ذات خاس بابه‌ت خاس ده‌ی کڵاوه نه پسه‌و کوذه که‌ڵاوێوه سه‌ره‌م پاقلیسه‌ن مه‌ڕچێۆ وه‌رو وارانیوه ته‌ر مه‌ۆ به‌توڕه‌یی شه‌ققه ذڵێوه‌ش دانوه‌نه کڵاوه‌کێم په‌رتافیا درویش ...که پسه‌و وه‌رده‌سی لاشۆوه کار که‌ره‌ێ پیایی فره عال بێ کێشانێش که‌نارو په‌شته‌و نه‌فتخانه‌یوه واتش ،هه‌تیم ده‌ی توێچ که‌م عه‌ناذ که‌ره بگێريش په‌شته‌و وێت نه‌فته‌کێت گرته لوه که‌ره‌شۆوه سه‌ره‌ت واتم سه‌رو چه‌مان .کڵاوه‌کێم گرته په‌شتیم به‌ده‌سێوه‌م وه به‌ده‌سێوه بتریه‌کیم به دووشه‌که‌وه نزیکه‌وه که‌رده واتش ئاااااااا ئیسه بێێ کۆرێ خاس نه‌فته‌کێش دان په‌نه دوێ قه‌رانێم داپه‌نه و گێڵانێ ئیسه‌یچ نه‌زانام ئا کابرا پچی وه رو ئا کڵاوه شه‌به‌قه دارێمه سڵ که‌رێ. دلێ ڕاێنه تا یاوانێوه یانه فره ناڕه‌ۆه‌ت بێنێ وه‌رو ئا ئا حه‌ره‌که‌تو کابرایه فره‌م په‌نه سه‌خت بێ کابرای زلو ملقه‌وی ئه‌رێ ئانه چێشس بێ ؟ وه‌رو ئانه‌یه نه‌زانام شۆبه نه‌فتێ تایانه چه‌نیم بڕی وه‌ختێ یاوانێوه یانه نیه‌ڕۆ بێ دڵم زه‌عفی که‌رێ واتم ئه‌ذا زه‌عفی مه‌که‌رو واتش ئانه ئۆراته‌ن بۆ پاڵاکێت به‌ر بۆره بنیشه‌ره تا کاسه‌یوه دۆێنه‌ی پیازداخ کریایت په‌ی که‌رونه‌ره حاڵت بێوه یاگێش ........ ئا نه شه‌که‌ته‌نی. درێژه‌ش هه‌ن....
هیچ نظری موجود نیست:
ارسال یک نظر