انا لله و انا الیه راجعون
ڕۆحش شاد
هه‌ناسه‌ی سه‌رد
هاوار جه ده‌مه‌ی هه‌ناسه‌ی سه‌ردم
بۆ پڕوس سۆته‌ی تۆتۆی جه‌رگم
قرچه‌ی مێڕیای بڕبڕی پشتم
بڕیا توانا فۆتیا هه‌ستم
له‌رزان کۆتان ئه‌رز زه‌نگۆڵ شکسته
چۆکش دان په‌نه ئێ باره سه‌خته
ئای نه ده‌س به‌رشی ئا گه‌نجه نه‌خته
قێرش نه‌زانا ئێ سیا به‌خته
تێر تێر نه‌نۆشام ئاو نه ئا چه‌شمه
سیا وا ئاوما وشک بی ئا به‌شمه
شه‌وان تا به‌ڕۆ شین وزاریمه‌ن
چێ زامه سه‌خته ده‌ردی کاریمه‌ن
ئازیز نه‌زانام عۆمری گۆڵ که‌مه‌ن
دڵ جه کۆچی ناوه‌عذه‌ت پر جه ماته‌مه‌ن
چه‌مم چون ده‌ریا لافاوش جارین
دڵ له‌ت له‌ت بیه‌ن ئێ ده‌رده کارین
وه‌ته‌ن سیا پۆش هۆرامان خه‌مگین
جه‌رگه‌ی ڕه‌فێقان داخدارو خه‌مگین
هۆری ڕه‌ش شاهۆش پۆژناش ئارۆ
چون ئازیز مه‌رده شرێخناش ئارۆ
وه‌شت به تاو خۆڕه‌م نه‌ڕوی که‌مه‌ردا
لافاوش هۆر که‌رد نه‌ڕوی ده‌مه‌ن دا
کۆساڵان بێ تۆ ده‌ماخش نیه‌ن
داڵانی بێ تۆ سه‌فاش پێم نیه‌ن
چنور جه شاهۆ وه‌نۆشه‌ی باخان
سه‌رکزو خه‌مبار چون دڵ پڕ داخان
ژیوایم فره تاڵه‌ن تاڵته‌ر بی ئارۆ
بێکه‌س بیم دایم بێکه‌س ته‌ر ئارۆ
زیندگیمچون ژار تاڵو بێ تام بی
یانه‌ی ته‌نیایم تاریکو تار بی
ئازیز به‌بێ تۆ ژینم زیندانه‌ن
ئه‌لوه‌دای ئاخر ئه‌وه نۆمامه‌ن
ساعه‌ت یه‌کو چلو هه‌شت ده‌یه‌قێ سۆحی29/07/2010
هیچ نظری موجود نیست:
ارسال یک نظر